ប្រតិបត្តិការខាងលើ គឺដឹកនាំដោយលោក ចាន់ វាសនា ប្រធានសាខាកាំកុងត្រួលខេត្ត ដោយសហការជាមួយមន្ទិរពាណិជ្ជកម្ម និងកម្លាំងប៉ូលីសសេដ្ឋកិច្ចខេត្ត កាលពីថ្ងៃទី១៦ ខែមិនា ឆ្នាំ២០១។
លោក ចាន់ វាសនា ប្រធានសាខាកាំកុងត្រូលខេត្តបានឲ្យដឹងថា ដោយផ្អែកទៅលើការណែនាំរបស់ អគ្គនាយកដ្ឋានកាំកុងត្រូលកម្ពុជា បានណែនាំដល់មន្ត្រីកាំកុងត្រូល គ្រប់សាខាទាំងអស់ទូទាំងប្រទេស ឲ្យធ្វើការត្រួតពិនិត្យទំនិញ ផលិតផលម្ហូបអារហារ តាមទីផ្សារជាប្រចាំ ដើម្បីរក្សាឲ្យបាននូវសុខមាលភាព ប្រជាពលរដ្ឋ។បន្ទាប់មកមន្ត្រីសាខាកាំកុងត្រូលបានធ្វើការត្រួតពិនិត្យមុខទំនិញរួមមាន៖ ប៉េងប៉ោះ ម្ទេសប្លោក ផ្កាខាត់ណា សណ្តែកគួរ សណ្តែកបណ្តុះ រួមជាមួយនឹងមឹក បង្គា ត្រីងៀត សាច់ក្រក សសៃគុយទាវ និងបន្លែជាច្រើនទៀត ជាលទ្ធផលពុំឃើញមានសារធាតុគីមីហាមឃាត់នោះទេ។
ដោយឡែក រថយន្តពិសោធន៍ចល័តរបស់ អគ្គនាយកដ្ឋានសាខាកាំកុងត្រូលបានបន្តពិនិត្យលើខ្ទឹមស ដែលនាំចូលមកពីប្រទេសវៀតណាមនៅផ្សារស្រុកកែវសីមា មន្ត្រីជំនាញបានរកឃើញសារធាតុគីមីនៅលើខ្ទឹមសនោះ ហើយមន្ត្រីជំនាញក៏បានធ្វើការណែនាំដល់អាជីវករឲ្យបញ្ឈប់នូវការនាំចូល ខ្ទឹមសនេះបន្តទៀត។ ជាមួយគ្នានោះដែរ លោក ចាន់ វាសនា ប្រធានសាខាកាំកុងត្រូលក៏បានចុះទៅ ធ្វើការណែនាំដល់ឲ្យអាជីវករឲ្យបញ្ឈប់លើការនាំចូលខ្ទឹមសប្រភេទនេះ ដើម្បីធ្វើយ៉ាងណារក្សាឲ្យបាននូវសុខភាពរបស់ប្រជាពលរដ្ឋ។
លោកប្រធានសាខាកាំកុងត្រួល បានបន្ថែមថា ប្រសិនបើអាជីវករចង់នាំចូលនូវប្រភេទខ្ទឹមសនេះមកលក់នៅកម្ពុជា លុះត្រាតែមានការអនុញ្ញាតិពីសមត្ថកិច្ចរបស់ប្រទេសវៀតណាមជាមុនសិន ហើយមន្ត្រីជំនាញ នឹងពិនិត្យឡើងវិញ។ បន្ទាប់មកទៀត មន្ត្រីជំនាញបានបន្តនាំយករថយន្តពិសោធន៍ចល័តរបស់អគ្គនាយកដ្ឋានកាំកុងត្រូល ដើម្បីពិនិត្យលើចំណីអាហារគ្រប់ប្រភេទ លើផ្សារសែនមនោរម្យ និងលើកការដាក់ តាំងលក់ពិព័រណ៌ពាណិជ្ជកម្មខេត្ត ស្ថិតនៅក្រុងសែនមនោរម្យ ជាលទ្ធអត់មានសារធាតុគីមីនោះទេ៕ដោយ ៖ រមនា
